कार्तिक-१२हुम्ला र मुगु जिल्लालाई जोड्ने महत्वपूर्ण सञ्जाल मानिने कटकुना बेली ब्रिज निर्माण अलपत्र परेपछि अहिले स्थानीयवासी र सवारी साधन चालकहरू झनै जोखिममा परेका छन्। तत्कालीन योजनाअनुसार निर्माण कार्य सम्पन्न हुनुपर्ने बेली ब्रिजको बीच भाग अझै अधुरो छ, जसका कारण अहिले गाडी तर्न विद्युत प्रसारण लाइनमा प्रयोग हुने पोलहरूको सहारा लिनुपरेको छ।
मुगुको सोरु गाउँपालिका र हुम्ला बीचको यातायात आवागमन सहज बनाउने उद्देश्यले निर्माण थालिएको यो बेली ब्रिज अलपत्र परेपछि स्थानीयमा आक्रोश बढ्दो छ। नदीमाथिको बेली ब्रिजको निर्माण ठेकेदार कम्पनीले बीचमै छाडेपछि यात्रु र सवारी चालकहरू जोखिम मोलेर यात्रा गर्न बाध्य छन्।
ब्रिजको मध्यभाग निर्माण नहुँदा हाल राष्ट्रिय प्रसारण लाइनमा प्रयोग गरिने फलामे पोलहरू प्रयोग गरी गाडी नदी पार गरिन्छ। पोलहरूलाई अस्थायी रूपमा बेली ब्रिजको अधूरो खण्डमा राखिएको छ। त्यही पोल माथिबाट हरेक दिन ट्याक्टर, मोटरसाईकल जीपलगायतका गाडीहरू आवतजावत गर्छन्। नदीको बहाव उस्तै भए पनि यो अस्थायी व्यवस्थामा भरी गाडी गुडाउनुपर्ने भएकाले यात्रु तथा चालकहरू दुवै असुरक्षित महसुस गर्छन्।
स्थानीयवासी भन्छन् । “बेली ब्रिजको बिच भागमा तार टाँगेर गाडी पार गर्नु त जोखिमको चरम अवस्था हो। यहाँ कुनै पनि बेला मानवीय क्षति हुनसक्छ। हामीले कति पटक माग गर्यौं तर सुनुवाइ भएन।”
उक्त ब्रिज निर्माणको जिम्मा लिएको ठेकेदार कम्पनी निर्माण कार्य प्रारम्भ गरेपछि केही सामान तथा सामग्री ल्याएर ब्रिजको एक छेउ निर्माण गर्यो। तर बिच भागमा आवश्यक पर्ने संरचना निर्माण नगरी काम रोकिएको छ। ठेकेदार कम्पनी अहिले सम्पर्कविहीन छ भने सरकारी निकायहरूले समेत चासो नदेखाएको स्थानीयको गुनासो छ।
सडक डिभिजन कार्यालय, निर्माण सुपरिवेक्षण गर्ने निकाय र सम्बन्धित गाउँपालिकाले पटकपटक ध्यानाकर्षण गरिए पनि काम अघि नबढेको हो। यसले सरकारी संयन्त्रप्रति स्थानीयहरूको विश्वास घटाएको छ।
वर्षा याम सुरु भइसकेको अवस्थामा नदीको बहाव बढ्नाले पोलहरू बगाउने खतरा पनि छ। यदि अहिले प्रयोगमा रहेको पोल असन्तुलित भएमा सवारी साधनसहित मानवीय क्षति हुने निश्चितप्रायः छ।सोरु गाउँपालिकाका अध्यक्ष धर्म बहादुर शाहीका अनुसार ठेकेदार कम्पनीसँग कुरा गर्यौं तर कुनै ठोस कार्यान्वयन भएको छैन।
स्थानीयवासी र जनप्रतिनिधिहरूले सरकारसँग तत्काल यो समस्या समाधान गर्न आग्रह गरेका छन्। ।हुम्ला-मुगु जोड्ने कटकुना बेली ब्रिजको अधुरो निर्माणले स्थानीयको जीवनमा प्रत्यक्ष असर पारेको छ।
