मुगु — सोरु गाउँपालिकामा अपांगता भएका व्यक्तिहरूका समस्या, आवश्यकता र समावेशी सेवासम्बन्धी विषयमा आज गाउँपालिकामा अनौपचारिक अभिमुखिकरण कार्यक्रम सम्पन्न भएको छ। कार्यक्रमले अपांगता भएका नागरिकलाई राज्यले दिएको सेवा–सुविधाबाट कोही पनि बन्चित नहोस् भन्ने उद्देश्यलाई विशेष प्राथमिकता दिएको छ।
कार्यक्रममा वडा नं. ६ का अपांगता संजाल सदस्य रुप बहादुर शाहीले भिरालो र दुर्घटना जोखिमयुक्त बाटोका कारण आवतजावत अत्यन्त कठिन हुने बताउँदै तत्काल सुधारका लागि पालिकालाई आग्रह गर्नुभयो। उहाँले अपांगता भएका व्यक्तिहरूको दैनिक जीवन सहज बनाउन “पहुँचयोग्य पूर्वाधार निर्माण अनिवार्य” रहेको उल्लेख गर्नुभयो।
ग्रामीण सामुदायिक संस्था GSS सुपरभाइजर धनबहादुर मल्लले अपांगता भएका व्यक्तिहरूलाई लक्ष्यित सेवा–सुविधा सरल रूपमा उपलब्ध गराउने उद्देश्यले नियमित रुपमा यस्ता कार्यक्रम हुँदै आएको जानकारी दिनुभयो।
यसैबीच, कार्यक्रममा प्रमुख प्रशासकीय अधिकृत शिहँराज डाँगीले दुई महत्वपूर्ण सन्देश दिनुभयो।
पहिलो, उहाँले भन्नुभयो—
“अपांगता भएका नागरिकहरूसँग सम्बन्धित प्रत्येक सेवा–सुविधा तथ्य प्रमाणसँगै सहज र पारदर्शी ढंगले वितरण गर्नुपर्छ। उनीहरूलाई बिचौलियाबाट हैरान हुन नदिन प्रशासन पूर्ण रूपमा प्रतिबद्ध छ।”
यस्तै, दोस्रो भनाइमा उहाँले समावेशी पूर्वाधार निर्माण आवश्यकतामा जोड दिँदै भन्नुभयो।
“अबदेखि बन्ने प्रत्येक संरचना—विद्यालय, पालिका भवन वा वडा कार्यालय—अपांगमैत्री हुनुपर्ने बताउनुभयो। समावेशी विकास नै दिगो विकासको आधार भएको उहाँको भनाई थियो।
कार्यक्रममा सहभागी वडाअध्यक्षहरूले समेत आफ्ना सुझाव राख्दै पालिकाभित्रका सार्वजनिक संरचनाहरूलाई अपांगमैत्री बनाउन आवश्यक बजेट र योजना अघि सारिने प्रतिवद्धता जनाएका छन्।
उक्त अभिमुखिकरण युनाइटेड मिसन टु नेपाल (UMN) कलस्टरको आर्थिक सहयोग तथा ग्रामीण सामुदायिक संस्था GSS मुगुद्वारा संचालित बहुभाषिक शिक्षा परियोजनाअन्तर्गत आयोजना गरिएको हो। परियोजनाले समुदायमा अपांगमैत्री वातावरण निर्माण र समावेशी शिक्षा प्रवर्द्धनमा महत्वपूर्ण भूमिका खेलेको ग्रामीण सामुदायिक संस्था GSS सुपरभाइजर धनबहादुर मल्लले बताउनुभयो ।
