सन्तोष प्रशाद जोशी
बाजुराको बूढीनन्दा नगरपालिका–स्थित दानसाँघु खोलामा बेलिब्रिज निर्माणका लागि शिलान्यास गरिएको छ। सडक डिभिजन कार्यालय साँफेबगरले करिब दुई करोड बाइस लाख रुपैयाँ लागतमा बडिमालिका नगरपालिका–जडाङ्गामा रहेको पुरानो बेलिब्रिजलाई स्थानान्तरण गरी दानसाँघु खोलामा पुनःस्थापना गर्न लागिएको हो।
एक औपचारिक कार्यक्रममा नगरपालिकाका उपप्रमुख रामबहादुर बोहोराले पुल निर्माणको शिलान्यास गर्नुभएको हो। ठेकेदार कम्पनीले चार महिनाभित्र पुल निर्माण कार्य सम्पन्न गर्ने लक्ष्य रहेको जनाएको छ।
बूढीनन्दा नगरपालिकाका प्रमुख जनककुमार बोहराका अनुसार नगरपालिकाको निरन्तर पहलपछि पुल स्थानान्तरण प्रक्रियामा आएको हो। उहाँकाे भनाइ अनुसार बेलिब्रिज निर्माण सम्पन्न भएपछि कोल्टी क्षेत्रका बासिन्दालाई सहज यातायात सेवा उपलब्ध हुने र स्थानीय आर्थिक गतिविधिमा समेत उल्लेखनीय सुधार हुने अपेक्षा गरिएको छ।
मार्तडी–कोल्टी सडक सञ्चालनमा आएको झन्डै २६ वर्ष बितिसक्दा पनि दानसाँघु खोलामा पक्की पुल नहुँदा बर्खायाममा सवारीसाधनलाई वारपार गर्न कठिनाइ हुँदै आएको थियो। सडक डिभिजन कार्यालय अछामले जडाङ्गामा रहेको बेलिब्रिजलाई त्यहीं राख्ने गरी दानसाँघु खोलाको स्थलगत अध्ययन तथा सर्भे पहिले नै गरिसकेको नगरप्रमुख बोहराले बताउनुभयो।
हिउँदमा कठ्यांग्रिँदो चिसो र बर्खामा खोला बढ्ने समस्या भएकाले वर्षेनी सवारीसाधन आवतजावतमा बाधा पर्ने गरेकोमा अब बेलिब्रिज निर्माण भएपछि यात्रु तथा स्थानीयवासीलाई ठूलो सहजता हुने नगरप्रमुख बोहराले बताउनुभयो।
पुल निर्माण सम्पन्न भएपछि बूढीनन्दा नगरपालिकाका कोल्टी, हिमाली, जगनाथ र स्वामिकार्तिक खापर गाउँपालिका साथै छिमेकी जिल्ला मुगु–हुम्लाका नागरिकले समेत यातायात सुविधा सहज रुपमा पाउने अपेक्षा गरिएको छ। हिउँदमा कोल्टीसम्म यातायात सञ्चालन भए पनि वर्षातका चार महिना दानसाँघु खोलामा पुल नहुँदा ढुवानी तथा सवारी सञ्चालनमा गम्भीर समस्या हुँदै आएको थियो, नगरप्रमुख बोहराले बताउनुभयो।
